HANKAK ARINTZEKO ERREMEDIOAK
Ba al zenekien udan sentitzen duzun hanketako astuntasuna zainetako zirkulazio txar baten ondorio dela?
Egunaren amaieran beroak hankak kargatzen dizkizula sentitzen baduzu, orkatilak handitzen bazaizkizu edo hanketan etengabeko astuntasuna sentitzen baduzu, itzulera zirkulazioa indartu eta arindu behar duzu.
Nola egiten da hori? Masajearekin, presoterapiarekin, ur hotzeko kontraste-bainuekin, paseatuz, zirkulazio tratamenduak eginez bendaje eta bilgarriekin, hankak goian jarriz eta, behar izanez gero, zirkulaziorako osagarri batzuk hartuz.
Baina, zergatik gelditzen da odola?
Funtsean, arrazoi hauek daude:
Bat da gure zainetako pareten kalitate txarra, dilatatzeko eta trinkotasuna galtzeko joera dutelako. Hori gertatzen denean, barruan dauden balbulatxo batzuk irekitzen dira, eta, beraz, odola bihotzerantz itzuli beharrean, gorantz, oinetarantz erortzen da, presioa handituz. Horregatik sentitzen dugu astuntasuna gorputzaren behealdean. Bada substantzia bat, Homozisteina, pareta horiek hondatzea eragiten duena; horregatik, batzuetan osagarri dietetikoak behar ditugu zirkulazioa aktibatzeko eta substantzia hori gure gorputzean kopuru altuegian egotea saihesteko.
Ohiko beste arrazoi bat da gure ehunetan toxiko gehiegi izatea. Gure odol sisteman eta sistema linfatikoan gainkarga handia dugunean, esan dezakegu odola “loditu” egiten dela eta gehiago kostatzen zaiola mugitzea. Hori konpontzen da elikadura aldaketekin eta desintoxikazio eta zirkulazio tratamenduekin.
Gehiegizko beroa. Tenperatura igotzen denean, zainak, arteriak, poroak eta abar “ireki” egiten dira tenperatura hobeto erregulatzeko. Baina, kasu horretan, zainak “presioa” galtzen du eta ezin du behar bezala ponpatu. Hori konpon daiteke, hankak goian jarrita, tratamendu krio-aktiboekin, masajeekin, presoterapiarekin, etab.
Denbora gehiegi zutik. Zutik ordu luzeetan lan egiten dugun ia pertsona guztiok sentitu dugu sentsazio hori. Beroaren eta grabitatearen beraren eraginez, zenbat eta ordu gehiago pasatu zutik, orduan eta linfa gehiago iragazten da, eta hankek handitzeko eta pisatzeko joera dute. Erremedioak hauek dira: masajeak, zirkulazio tratamenduak, presoterapia, hankak goian jartzea, eta hori prebenitzea konpresio galtzerdiekin eta/edo zirkulaziorako aktiboak dituzten gel hotzekin.
Ohikoa ez bada ere, pertsona batzuei ez die ondo zirkulatzen odolak nutriente faltagatik; adibidez, ohiko kasu bat burdin falta izaten da. Nahikoa mineral eta nutriente ez baduzu, odolak ez du mugitzeko “indarrik” eta, esan bezala, gorputzaren beheko aldean geratzeko joera du. Hori hobetu daiteke, aldez aurretik analitika edota test kinesiologikoa egin eta, graduaren arabera, odola elikatuz. Ondoren, behar diren osagarriak eransten dira elikaduran.
Bada gutxiago aipatzen den beste arrazoi bat, ez baita arrazoi fisikoa, deituko diogu… Pertsonaren… “BIZI JARIORIK EZA”; hau da, gure emozioak trabatzen direnean, arnasa motz hartzen dugunean, antsietatearekin gaudenean, etab… Horrelakoetan, gure likidoak ere ez dira jariatzen, eta gure zirkulazioak okerrera egiten du, odolekoak zein linfatikoak. Eta zer egin dezakegu kasu honetan? Barrutik begiratu, gure emozioak baloratu eta hobeto onartzeko zerbait egin dezakegun ikusi; eta gero, ahal bada, aldatu. Zure kasua bada, baina zer behar duzun topatu ezinik bazabiltza, Kinesiologia saio bat lagungarri izan dakizuke bidea aurkitzeko.
Elikadura hedakorregia (edo Yin gehiegi, Txinako Medikuntza Tradizionalak esaten digun bezala). Zer da hori? Izatez, beren ezaugarri energetikoengatik, gure elektroiak kanporantz mugiarazten dituzten elikagaiak dira; hau da, ehunak dilatatzeko joera dutenak, eta aurretik ikusi ditugun efektu guztiak okertzen dituztenak. Paradoxikoki, elikagai horietako asko oso “udakoak” dira, esate baterako garagardoa eta izozkiak. Bai, badakit disgustua ematen dizuedala! eta ez dizuet ezer debekatuko. Besterik gabe, garrantzitsua iruditzen zait hori jakitea, erremedioa jartzeko edo kontsumoa mugatzeko eta bestelako albo kalterik ez jasateko.
Ikusiko duzuenez, arrazoi asko daude, izaki bizidunei eragiten dien guztia bezala, gure genetikaren eta kanpoko faktoreen eraginpean.
Udarako gure gomendioak klasikoak dira. Egin ibilaldi ederrak ilunabarrean, bainatu itsasoan edo hartu dutxa hotzak, aplikatu egunero zirkulazio krema on bat (kontsultaiguzu). Jan elikagai fresko eta sasoikoak —frutak, entsaladak eta barazkiak—proteina arinekin batera, esate baterako arraina eta haragia plantxan. Ahal dela, saihestu freskagarri azukredunak, esneki izoztuak eta gozokiak oro har, baita alkohola ere.
Barizeak badituzu eta udan zutik lan egitea tokatzen bazaizu, bilatu bilgarri freskagarriekin egiteko zirkulazio tratamenduak, edo eskaiguzu zirkulazioko osagarriren bat testatzeko. Masajeak eta presoterapia ere, aliatu handiak izango dituzu.
Gozatu udaz, zaindu, maita zaitez eta… Ez utzi zeure burua gerorako!